Xosé Filgueira Valverde
MARELA! Andaba a pastar vacas nos cobos das Xunqueiras. O choio non rendía e tivo que entrar de peón na fábrica. De peón pasou a torneiro, e de torneiro a mecánico, e agora é capitán dunha máquina enorme que vale moitos millóns e mesmo semella que ten alma. Chámalle «Marela!» e fálalle como falaba ás vacas que baixaba ao río. E cando encomenza a súa «xornada laboral», porque agora é un productor sindicado, pódese escoitar como lle di,ollándolle ben fixo aos controis: -Marela! A ver como te portas hoxe...